Bjóst ekki við að ná svona langt

Aðalheiður Rósa Harðardóttir náði glæsilegum árangri á HM í karate sem nú stendur yfir í París í Frakklandi. Aðalheiður Rósa varð í 9.-16. sæti í kata kvenna en alls var 51 keppandi skráður til leiks.

Kata er sú keppnisgrein í karate þar sem keppendur skiptast á að sýna æfingar á gólfi. Fimm dómarar dæma æfingarnar og gefa öðrum keppandanum sitt atkvæði. Aðalheiður Rósa vann fyrstu tvær keppnir sínar 4-1 og 5-0 en tapaði svo naumlega, 3-2, fyrir keppanda frá Síle í 16 manna úrslitum.

„Ég bjóst engan veginn við því að ná svona langt. Hingað til hef ég aldrei komst upp úr fyrstu umferð á stórmótum eins og þessum," sagði hún við Fréttablaðið í gær. „Ég er því í skýjunum yfir þessum árangri."

Aðalheiður Rósa verður tvítug í næsta mánuði og á því langan feril fram undan, kjósi hún að leggja áfram stund á íþróttina. „Yfirleitt er verið að toppa á milli 25 og 28 ára aldurs og því leit ég á þetta mót sem tækifæri fyrir mig til að öðlast reynslu," segir hún.

Ísland á nú í fyrsta sinn keppnissveit í hópkata á HM en auk Aðalheiðar Rósu eru Kristín Magnúsdóttir og Svana Katla Þorsteinsdóttir í sveit Íslands. Þess má geta að þær urðu Norðurlandameistarar í hópkata í apríl síðastliðnum. Þær hefja keppni í dag.

„Við erum búnar að æfa stíft síðan í sumar og teljum að við séum tilbúnar í slaginn. Við munum þó mæta erfiðum andstæðingi í fyrstu umferð en ef við hittum á góðan dag er allt mögulegt."