Tvítugsafmæli á óvissutímum í Evrópu

Evrópusambandið fagnaði því í þessari viku að 20 ár væru liðin frá því að innri markaði ESB var hleypt af stokkunum. Með því voru felldir niður múrar milli ríkjanna og ESB í raun skilgreint sem eitt markaðssvæði. Ísland hefur verið þátttakandi í markaðnum frá árinu 1994 þegar samningurinn um Evrópska efnahagssvæðið tók gildi.

Nokkur kaldhæðni er í því að tuttugu ára hátíðarhöldin fara fram í skugga alvarlegustu efnahagslægðar í sögu sambandsins. Þrátt fyrir allt sem á hefur gengið síðustu ár er því ekki að neita að mikið hefur breyst á tuttugu árum.

Árið 1986 náðu ríki Evrópubandalagsins, sem þá hét, saman um Einingarlögin svokölluðu sem ruddu brautina. Það var svo hinn 1. janúar 1993 sem landamæraeftirliti milli hinna tólf ríkja ESB var hætt og innri markaðurinn var formlega orðin staðreynd.

Þrátt fyrir að standa utan ESB nýtur Ísland að mörgu leyti góðs af þátttöku á innri markaðnum í gegnum aðild sína að Evrópska efnahagssvæðinu.

Á þeim tíma hafa viðskipti Íslands við innri markaðinn aukist verulega og í fyrra nam útflutningur til Evrópu 83% af heildarútflutningi Íslands.

Tækifæri Íslands á innri markaðinum liggja þó ekki eingöngu í viðskiptum heldur í samvinnu á mennta- og rannsóknasviðinu.

Um þessar mundir stendur yfir endurskoðun innri markaðarins. Fyrr í mánuðinum setti Framkvæmdastjórn ESB fram aðgerðaáætlun í tólf punktum til að efla vöxt, þar á meðal með bættum samgöngum og auknum tækifærum borgara til að leita tækifæra í öðrum ríkjum.

Þær aðgerðir eiga að koma til framkvæmda í ár og á því næsta.