"Gamla Ísland lifi að eilífu! Sad but true!"

Nú dælast inn örfærslur á samskiptamiðilinn Twitter um fyrstu tölur í forsetakosningunum. Fólk hefur sterkar skoðanir, ýmsir básúna þar bölsýnisspár og vanda samlöndum sínum ekki kveðjurnar. Aðrir segja brandara.

„Þorri þjóðarinnar er greinilega nautheimskur," segir einn og annar hrópar upp „Gamla Ísland lifi að eilífu! Sad but true!"

Eftir að fyrstu tölur af suðurlandi birtust þar sem Ólafur fékk yfir 60% atkvæða lýstu margir því yfir að þeir myndu halda sig sem lengst frá þeim landshluta í sumar.

Einn spyr „Verður vítaspyrnukeppni í lokin?“ og annar segir „Ég er alvarlega að pæla í að fá mér tattúið Ég er ekki þjóðin :)“

Ólafur er með um 50% miðað við þau atkvæði sem þegar hafa verið talin. Það kveikir einlæga sorg og reiði í hjörtum margra. Aðrir reyna að vera jákvæðir „Ég reyni alltaf að sjá björtu hliðarnar. Dorrit er frábær. Hananú, þá er jákvæðnin uppuri," segir einn. Og fleiri viðra ást sína á forsetafrúnni.

Það sem mesta lukku hefur vakið á Twitter er auglýsing Símans sem birtist eftir að fyrstu tölur komu í hús, en hún var nokkurs konar auglýsing í beinni útsendingu. „Sigurvegari kvöldsins so far er auglýsing í beinni," segir einn og fleiri óska Símanum til hamingju með fagmannlega auglýsingamennsku.

Umræðan á Twitter fer fram undir flokknum #forseti.