Rekin vegna Ólympíuleikanna?

„Það er auðvitað algjörlega út í hött að ef menn tapa á Ólympíuleikum komi það niður á til dæmis starfsfólki á Rás 1, réttara sagt á hlustendum," sagði Mörður Árnason, alþingismaður Samfylkingar, á þingfundi í fyrradag. Vitnaði Mörður til „lausafregna" um að fjárhagur RÚV væri nú miklu verri en áður hefði komið fram.

Katrín Jakobsdóttir, mennta- og menningarmálaráðherra, kvaðst hafa óskað eftir greinargerð frá RÚV og biði hennar. „Menn sáu fram á að ákveðnir kostnaðarsamir liðir mundu falla á árið í ár, þar nægir að nefna Ólympíuleikana og Evrópukeppnina í knattspyrnu, en töldu að allt væri innan marka. Síðan hef ég fengið þær fregnir, eins og háttvirtur þingmaður, að til standi að fara í aðhaldsaðgerðir á Ríkisútvarpinu," sagði ráðherra og bætti við að stjórn Ríkisútvarpsins ohf. myndi væntanlega fara yfir málið á næstunni.

Stjórn RÚV fundaði síðdegis í gær. Þegar náðist í Björgu Evu Erlendsdóttur, formann stjórnarinnar, sagði hún fundinum ólokið og gaf sér ekki tíma til að svara spurningum um aðhaldsaðgerðirnar.- gar