Bjargað eftir fjóra tíma í miðri jökulá

Fimm hestamönnum var bjargað af eyri í miðri Jökulsá í Lóni í fyrrakvöld við vondar aðstæður. Þeir höfðu fyrr um kvöldið horft á eftir félaga sínum niður ána eftir að hesti hans skrikaði fótur í grjótinu í ánni. Maðurinn fannst látinn undir miðnætti.

„Þetta var tæpt, en það hafðist,“ segir Henning Aðalmundarson, sem var í áhöfn TF-LÍF, þyrlu Landhelgisgæslunnar, sem kom mönnunum fimm til aðstoðar. „Þeir voru mjög fegnir björguninni.”

„Það voru skítaaðstæður og mjög þröngt þarna niðri. Við vorum búnir að fara nokkra hringi og reyna að komast að þeim en þurftum alltaf frá að hverfa. Svo vorum við eiginlega hættir við en ákváðum að reyna einu sinni enn af því að okkur fannst alveg skelfilegt að þurfa að skilja mennina eftir þarna,“ segir Henning.

Fimmmenningarnir höfðu þá hírst á eyrinni í vel á fjórðu klukkustund og voru sumir orðnir mjög kaldir og hraktir. Ómögulegt er að segja til um hvernig þeim hefði reitt af ef ekki hefði tekist að lenda þyrlunni á eyrinni á tólfta tímanum.

Henning segir að þangað til lendingin heppnaðist hafi þeir eingöngu notað nætursjónauka. „Karlarnir á eyrinni vissu eflaust ekkert hvað við vorum að gera eða hvort við værum yfirleitt búnir að finna þá.“

Þess vegna hafi mennirnir kveikt á neyðarblysi. „Það gerði illt verra því að það blindaði allt um borð hjá okkur. Þetta hefði getað verið alveg fatalt ef við hefðum verið í lendingu en slapp. Það bjargaði öllu að við vorum í sambandi við björgunarsveitarbíl uppi á Illakambi sem sagði okkur til,“ bætir Henning við og segir aðstoðina frá Björgunarfélagi Hornafjarðar hafa verið ómetanlega.

Þegar á eyrina var komið létti áhöfnin á þyrlunni með því að skilja alls konar búnað eftir til að koma mönnunum fimm fyrir. „Annars var hætta á að þyrlan færi ekki á loft,“ segir Henning.

Að björgunaraðgerð lokinni var tekið til við að leita að manninum sem áin tók. Hann fannst undir miðnætti og var látinn. Maðurinn er á fimmtugsaldri en ekki er unnt að greina frá nafni hans að svo stöddu.

Talið er að hestarnir séu allir heilir en þeir verða sóttir á næstu dögum. stigur@frettabladid.is