Herdís: Fólk leitar skjóls hjá stjórnvöldum sem það finnur ekki

„Þetta hefur verið yndislegur dagur," segir Herdís Þorgeirsdóttir forsetaframbjóðandi en hún hóf daginn á því að kjósa í Ráðhúsi Reykjavíkur. Og andrúmsloftið var gott að sögn Herdísar, þannig glampaði sólin á tjörnina þar sem svanapar synti í rólegheitum. „Mér leið eins og Dimmalimm," segir Herdís.

Hún segir daginn hafa verið rólegan. „Fólk er örugglega búið að gera upp hug sinn þó svo að nokkrir hafi komið við, sem enn eru að velta vöngum," segir Herdís en nokkur straumur af fólki hefur verið á kosningaskrifstofu hennar á Laugaveginum í dag.

Herdís segist einnig hafa rætt við fólk sem eigi um sárt að binda, „og þeir segja að það sé þeirra reynsla að kjörnir fulltrúar loki á þá eftir að þeir eru kjörnir," segir Herdís.

Hún segir finna fyrir miklum meðbyr í framboðinu, „og fólk hefur sagt að ég hafi lyft umræðunni og hún hafi orðið innihaldsríkari fyrir vikið," segir Herdís.

Herdís segist einnig verða var við að almenningur geri miklar kröfur til embættisins. „En öll þessi umræða um forsetaembættið, hvort sem það er út frá þeim forsendum að embættið sé pólitískt eða valdalaust, þá er fólk að kalla eftir einhverju skjóli hjá stjórnvöldum sem það finnur ekki eins og er."