Hver á að borga skattinn

Það hefur varla farið fram hjá þjóðinni að ferðaþjónustuaðilar í hótel- og gistiþjónustu eru æfir út í ríkisstjórnina vegna hugmynda um að stórhækka virðisaukaskatt á gistinætur hótelrekenda og annarra sem sinna gistiþjónustu. Lagt er til að hækka virðisaukaskattinn úr 7% í 25,5% á næsta ári.

Ég tek að vissu leyti undir áhyggjur fyrirtækja í þessum rekstri, og margir hugsa af hverju ríkistjórnin þurfi að bregða fæti fyrir fyrirtæki sem eru í örum vexti og eru í harðri samkeppni við önnur fyrirtæki út um allan heim. Væri ekki nóg að þakka fyrir alla þá grósku sem ríkt hefur í ferðaþjónustu hér á landi eftir hrun og nánast bjargað þjóðinni úr hruninu? Þegar skoðað er hversu dýrt er að lifa á Íslandi sem ferðamaður miðað við önnur Evrópuríki, kemur í ljós að Ísland skipar 7. sætið á þeim lista.

Samt er rukkað ákveðið gistinóttagjald sem ferðamaðurinn er rukkaður aukalega um þegar hann tjékkar sig af hótelinu, en hótelin hér á landi hafa hingað til ekki tekið það á sig að greiða gistináttagjaldið, sem hleypur á innan við tveimur hundruðum á meðan annars staðar í Evrópu eru þetta oft á tíðum nokkrar evrur. Hið furðulega við verð á gistingu hér á landi er að verðið hefur hækkað umtalsvert meira en eðlilegt þykir í samhengi við aðrar verðlagsþróanir hér á landi, og á sama tíma hefur gengið verið mjög hagstætt ferðaþjónustuaðilum til að græða og notfæra sér veikingu krónunnar. Einnig greiða fyrirtæki í hótelrekstri lægri tekjuskatt af hagnaði en önnur fyrirtæki hér á landi. Samt sem áður hafa fyrirtæki í þessum geira séð sig knúin til að hækka verðið á gistingunni og telja sig á sama tíma ekki geta greitt hærri skatta, sökum samkeppninnar við önnur ríki.

Hið kjánalega við skattinnheimtur ríkisins gagnvart ferðaþjónustuaðilum er að þau fyrirtæki sem sjá um farþegaflutninga, má þar nefna rútur, sleðaferðir, hestaferðir og leigubíla svo eitthvað sé nefnt, greiða engan skatt af þessari þjónustu. Að mínu mati eiga allir í þessum geira að sitja við sama borð og greiða sama virðisaukaskattinn hvort sem þú ert að reka stórt hótel, litla hestaleigu eða leigubíl.

Það sem rekstraraðilar í ferðaþjónustu verða að huga að er að skattur vegna þessarar greinar er mikilvægur svo hægt sé að leggja fé í markaðssetningu eins og með Inspired by Iceland sem kostaði ríkissjóð hundruð milljóna. Svo ekki sé minnst á allan þann kostnað að halda úti vinsælum áningarstöðum hér á landi eins og Gullfossi og Geysi sem eru að kafna vegna átroðnings. Aukin skattinnheimta í ferðaþjónustunni þýðir bara aukið öryggi á öllum fallegu áfangastöðum landsins og hér er verið að láta þá sem rukka fyrir þjónustuna greiða gjald fyrir að selja hana. Það er því miður til takmarkað fé í ríkiskassanum og ef þjóðinni finnst mikilvægara að skera niður í velferðarkerfinu og lækka enn frekar fæðingarorlof foreldra og barna og vaxtabætur, svo eitthvað sé nefnt, verði íslensku þjóðinni þá að góðu næstu árin. Hér er algjört lykilatriði að standa vörð um íslenska ferðaþjónustu og á sama tíma að gæta jafnræðis þegar kemur að skattinnheimtu ólíkra ferðaþjónustuaðila hér á landi.