Ískyggilegt svar

Hjálmar Sveinsson er nú meiri Jókerinn. Hann vill að umræðunni um Ingólfstorg sé lyft á hærra plan en hellir sjálfur meiri steypu inn í umræðuna en hann ætlar að setja á sjálft torgið. Svar varaformanns Skipulagsráðs Reykjavíkurborgar við grein minni um ljós og skugga í nýju skipulagi Austurvallar og Ingólfstorgs var kraftmikið og snarpt en var því miður gegnsýrt af ótta borgaryfirvalda við opna umræðu um skipulagið. Ég er sammála Hjálmari að það gangi ekki að umræðan byggist á rangfærslum, því langar mig að leiðrétta fjölmargar vitleysur í málflutningi hans.

Áður vil ég þó nefna eitt atriði úr grein Hjálmars sem mér fannst ískyggilegt. Í lok greinar sinnar gefur hann í skyn að allir sem mótmæla áformum borgarstjórnar með undirskrift sinni á ekkihotel.is séu afvegaleiddir. ?Sé farið þangað inn kemur í ljós að þar hefur tekist að fá yfir 10.000 manns til að skrifa undir svipaðar rangfærslur og eru í grein Sverris.? Það er ekki boðlegt að borgarstarfsmaður afgreiði málflutning andstæðinga skipulagshugmynda á þennan hátt og geri lítið úr þúsundum manna sem setja kröfur sínar fram á lýðræðislegan hátt.

Þá að upptalningu í svari Hjálmars þar sem hann er á villigötum í öllum fimm liðunum.

1. Það er rangt hjá Hjálmari að sólarsýn á Austurvelli minnki ekki. Hann sleppir því að taka nýbyggingarnar sitthvoru megin við Landsímahúsið með í reikninginn en báðar standa þær í vegi fyrir eftirmiðdagssólinni. Viðbótarhæðin ofan á Landsímahúsinu mun einnig varpa skugga á Austurvöll þó hún sé með hallandi mansardþak.

2. Þriggja hæða hús við hlið lágreistra húsa í þröngum götum eru há hús í hlutfalli við umhverfið. Steypta húsið sem stendur austan Aðalstrætis er 5 hæðir. Því er rétt að tala um að há stórhýsi þrengi að elsta húsi Reykjavíkur.

3. Allir sem hafa gengið Vallarstræti frá Austurvelli hafa upplifað að það er þröngt og skuggalegt sund. Ekki batnar það við að lengja sundið milli enn hærri húsa og þéttari en er að finna í Grjótaþorpinu sem Hjálmar vitnar til sem fyrirmyndar. Fólk er ekki fífl og þó sundið sé kallað gata sér fólk þetta sjálft með því að labba sundið.

4. Ég hef persónulega tekið þátt í umræðum við borgarstjórnarfólk um að það þyrfti að takmarka umferð almennings um Kirkjustræti vegna fyrirhugaðs hótels í Landsímahúsinu. Það er ekki hluti af tillögunum núna en umferðarvandamálið er augljóst þegar hótelið er teygt alveg fram á Kirkjustrætið.

5. Torg afmarkast af húsunum sem umlykja þau. Ingólfstorg og möguleikar til útivistar þar munu

minnka við fyrirhugaða nýbyggingu á torginu. Þó að ís- og samlokuhúsin séu fjarlægð og bílastæði lögð niður.

Af þessari upptalningu sést að svör varaformanns Skipulagsráðs Reykjavíkur eru villandi, sem er dapurlegt fyrir skynsamlega umræðu um skipulagsmál. Látum ekki hvassyrta embættismenn fæla okkur frá umræðum, tökum þátt, hvert á sinn hátt, með sínum stíl og sínu orðfæri. Lýðræðið eflist þegar við segjum hug okkar. Mótmælum illa hönnuðu skipulagi og skrifum strax í dag undir á: ekkihotel.is.