Gamall gærukollur í tísku í útlöndum

Gærukollur sem hannaður var fyrir fjörutíu og tveimur árum eykur nú hróður íslenskrar hönnunar víða um heim. Víða er bannað að sitja á kollinum.

Menningarmiðstöðin The American Scandinavian Foundation í New York keypti í síðustu viku koll eftir Sigurð Má Helgason. Kollurinn ber heitið Fuzzy eða Loðlingur og var hannaður árið 1970 af Sigurði og þótti þá um margt nýstárlegur en ber nú hróður íslenskrar hönnunar víða um heim.

Loðlingur komst til að mynda í sviðsljósið í maí síðastliðnum en Dorrit Moussaieff, eiginkona Ólafs Ragnars Grímssonar forseta, kynnti hann þegar hún var gestur í matreiðsluþætti Mörthu Stewart.

En kollurinn skýtur víðar upp kollinum. „Ég hef nú ekki verið nógu duglegur við að halda nöfnunum á þessum stöðum til haga,“ segir Sigurður Már. „En hann er á einhverju safni í Finnlandi, nú og svo bæði í Svíþjóð og Danmörku. Síðan hef ég líka selt Japana fimm stykki. Það eru eflaust ekki mörg íslensk húsgögn sem fara alla leið þangað.“

Þó gærukollurinn hafið verið lengi að ná þessum hæðum komst hann þó í tísku hér á landi fljótlega eftir að hann var hannaður. „Hann varð fljótlega vinsæll til fermingargjafa. Það eru enn að koma til mín konur sem fengu hann á sínum tíma í fermingargjöf og eru nú að biðja mig að lappa aðeins upp á hann.“

Sigurður Már segir að í seinni tíð sé orðið erfitt að dæma um hvort hann eigi að flokkast undir húsgagn eða skrautmun.

„Ég veit að sums staðar er alveg bannað að sitja á honum. Eins og gefur að skilja er það nú ekki algengt um kolla. Svo veit ég um mann sem tók niður Kínavasann og setti gærukollinn upp á hillu rétt eins og hvern annan skrautmun.“

Sigurður Már hefur einnig hannað lampa sem hann kallar Kraum og eru úr gleri og við. Þó hann sé nú orðinn sjötíu og tveggja ára er hann síður en svo hættur að hanna en hann lætur ekkert hafa eftir sér um það hvers konar furðuverk skjóti upp kollinum næst.jse@frettabladid.is