Gamalt sláturhús verður hótel

Fosshótel opnar 41 herbergis hótel á Patreksfirði í maí á næsta ári. Samningar þess efnis voru undirritaðir á Patreksfirði í gær. Það verður langstærsta hótelið á svæðinu segir Ásthildur Sturludóttir, bæjarstýra Vesturbyggðar. Hótelið verður í endurbyggðu vinnsluhúsi en í því var áður rekið sláturhús og fiskvinnsla.

Davíð Torfi Ólafsson, framkvæmdastjóri Fosshótela, segir að heildarfjárfesting vegna kaupa á fasteigninni og fyrirhugaðra breytinga sé áætluð 350 til 400 milljónir króna. Um fimmtán til tuttugu manns munu vinna við rekstur hótelsins. Hann segir að í hótelinu verði veitingahús og veitingasalur fyrir um fjörutíu til fimmtíu manns en einnig verði reynt, í samvinnu við heimamenn, að nýta félagsheimilið til funda, ráðstefna og annarra viðburða, en félagsheimilið er steinsnar frá.- jse