Fara langar leiðir til að sækja fisk á grillið

Fiskbúðin Sjávarkistan í Ólafsvík er eina fiskbúðin á Vesturlandi. Hún er aðeins rekin í þrjá mánuði á sumrin og verslar aðeins með fisk af Snæfellsnesinu. Sumarbústaðafólk leggur langa lykkju á leið sína til að komast í fiskbúð.

Fiskbúðin Sjávarkistan í Ólafsvík á Snæfellsnesi er eina fiskbúðin á Vesturlandi. Hún sinnir Snæfellsnesinu eins og það leggur sig og dæmi eru um að sumarbústaðaeigendur í Borgarfirði aki alla leið á Snæfellsnes til þess eins að sækja sér fisk á grillið.

Samkvæmt óvísindalegri rannsókn Fréttablaðsins er næstu fiskbúðir að finna í Mosfellsbæ og á Flateyri og Ísafirði.

Sigurður Ingi Guðmarsson stendur vaktina í Sjávarkistunni og segir fisksöluna aðeins vera sumarverkefni. „Þetta er sumarverkefni og ekkert sem er komið til að vera. Við höfum aðeins opið hér yfir sumarmánuðina þrjá; júní, júlí og ágúst. Svo lokum við bara á veturna.“

„Það var Einar Magnús Gunnlaugsson sem fékk mig hingað og í þetta,“ segir Sigurður Ingi sem er aðfluttur úr Hafnarfirði. „Hann er höfuðið í þessu öllu saman.“

Sjávarkistan var opin í fyrrasumar líka en þá aðeins til klukkan sex á daginn. Sigurður Ingi segir að nú sé búðin opin til átta því eftirspurnin er meiri um kvöldmatarleytið. Boðið er upp á ferskan fisk, kryddleginn og tilbúna rétti.

Verkefnið miðar að því að styðja við fyrirtækin á svæðinu. „Við reynum að selja eins ferskan fisk og við getum,“ segir Sigurður Ingi. „Við höfum eingöngu verið að fá frá fyrirtækjunum hérna í kring.“

Spurður hvaðan hráefnið komi helst segir hann að fiskurinn komi frá Ólafsvík ásamt hinum þorpunum á norðanverðu nesinu. „Við höfum fengið vörur úr öllum þorpunum í kringum okkur. Það eru Stykkishólmur, Grundarfjörður, Rif og Hellisandur. Við fáum hráefnið þaðan hvort sem það eru tilbúnir réttir eða ferskur fiskur.“

Sigurður Ingi bendir á að í fiskborðinu séu aðallega óhefðbundnar íslenskar fisktegundir. „Við erum ekki með þetta hefðbundna, heldur erum við með langlúru, lúðu, keilu, steinbít og skötusel. Hér seljum við aðeins fisk sem veiðist hér í Breiðafirðinum.“

birgirh@frettabladid.is