Vilja ræða mögulega sameiningu

Bæjarstjórn sveitarfélagsins Garðs samþykkti á síðasta fundi sínum að verða við ósk frá fulltrúum Reykjanesbæjar um að funda um mögulega sameiningu sveitarfélaganna Garðs, Sandgerðis og Reykjanesbæjar.

Reykjanesbær sendi hinum sveitarfélögunum beiðni þess efnis í síðasta mánuði, með þeim rökum að spara mætti í rekstrarkostnaði og efla faglegt starf í ýmsum málaflokkum.

Fimm bæjarfulltrúar samþykktu tillöguna en tveir fulltrúar úr meirihluta sátu hjá.

Að sögn Ólafs Þór Ólafssonar, forseta bæjarstjórnar í Sandgerði, var málið tekið fyrir í bæjarstjórn á fimmtudag, en vísað til bæjarráðs sem mun taka efnislega afstöðu til málsins á fundi í næstu viku.

Kosið var um sameiningu sveitarfélaganna haustið 2005, en Garður og Sandgerði felldu þá tillöguna með miklum mun.

- þj