Hvað getur þú gert í þágu umhverfisins?

Nú er að byrja fallegur árstími. Vorið er á næsta leiti, farfuglar koma í hópum til landsins og söngur garðfugla fyllir loftið. Fyrstu grænu stráin stinga sér í gegnum jarðveginn og trén eru að springa út. Krókusar eru búnir að blómstra og páskaliljurnar og túlípanar sýna sitt fegursta.

Því miður er ekki alltaf fallegt að líta í kringum sig þegar farið er í gönguferð. Rusl og drasl er víða að sjá og sýnir að við á þessu skeri sem auglýsum landið okkar sem hreint og óspillt erum frekar á byrjunarreit hvað umhverfisvitund snertir. Mjög jákvætt er að það séu átök í gangi að virkja íbúa til að hugsa um nánasta umhverfi sitt.

Ekki gera ekki neitt! Ég man ekki í hvaða auglýsingu þetta slagorð var notað. En við getum haft þetta í huga þegar það kemur að umhverfisvernd. Hver og einn getur lagt sitt af mörkum og samantalið mun það hafa jákvæð áhrif á framtíð okkar sem jarðarbúar.

Hér eru nokkur atriði sem hver og einn gæti bætt sig í:

Fylgjumst með því sem er gerast á okkar landi. Verum gagnrýnin á það sem okkar ráðamenn vilja gera. Athugum í hvað skattpeningarnir fara: Eru það auknar gatnaframkvæmdir eða eru það ráðstafanir sem munu efla vistvænar samgöngur? Viljum við að náttúruperlunum okkar verði fórnað í brjálæðislegar virkjunarframkvæmdir sem munu skapa atvinnu í stuttan tíma? En hvað svo? Við ættum að vita betur eftir að við lentum í Kárahnjúkaævintýrinu sem varð okkur dýrt og er það enn. Hver og einn getur látið í sér heyra og haft áhrif þannig.

Verum gagnrýnin á áróður hagsmunahópa sem vilja græða mikið á stuttum tíma. Góðir hlutir gerast yfirleitt hægt. Viljum við til dæmis að okkar lífeyrissparnaður fari í áhættusamar framkvæmdir eins og Hverahlíðarvirkjun eða sæstreng?

Kaupum umhverfisvænt: Veljum frekar vörur sem eru merktar alþjóðlegum umhverfismerkjum, t. d. svaninum. Forðumst að kaupa vörur í miklum og óþörfum umbúðum. Notum margnota innkaupapoka í staðinn fyrir plastpoka, Íslendingar eiga örugglega met í notkun einnota plasts í Evrópu. Minnkum notkun á vörum sem eru búnar að ferðast um hálfan hnöttinn og kaupum frekar árstíðarbundið, t.d. jarðarber þegar þau eru til úr innlendri ræktun.

Verum góð fyrirmynd fyrir börnin okkar: Kennum þeim að henda ekki rusli frá sér hvar sem er. En pössum okkur sjálf á því að: Ganga vel frá ruslatunnunum svo að ekki fjúki upp úr þeim. „Gleyma“ ekki hundaskítspokunum á leiðinni. Taka til eftir áramótaflugeldana okkar. Ganga tryggilega frá byggingarefninu og festa það niður, það vita jú allir að það getur komið hvassviðri. Stinga smárusli frekar í vasann, við vitum jú að sumum líður illa þannig að þeim finnst gaman að sparka botninn úr ruslílátunum.

Minnkum bílanotkun: Gott er að plana daginn og hvaða ferðir eru nauðsynlegar. Oft er hægt að tengja erindin saman. Forðumst óþarft skutl og kennum börnunum frekar að nota strætó, reiðhjól eða bara fæturna, kennum þeim einnig að klæða sig eftir veðri.

Tökum nagladekk tímanlega af bílunum, sérstaklega á höfuðborgarsvæðinu. Íhugum hvort yfir höfuð sé nauðsynlegt að nota nagladekk og hvaða aðrir kostir eru í boði.

Byrjum að flokka ruslið: Margt endurnýtanlegt efni fer í urðun og þetta er bæði sóun á verðmætum og kostnaðarsamt. Jarðvegurinn tekur ekki endalaust við, alveg eins og sjórinn og andrúmsloftið. Það mætti til dæmis byrja að safna dagblöðum / fernunum í sérílát og flöskum / dósum í annað. Það er ekki mikill aukakrókur að keyra þetta reglulega í endurvinnslustöðvarnar. Þegar maður er kominn á lag með þetta er hægt að bæta við söfnun á gleri, plastumbúðum og jafnvel fleiru.

Og athugum hvort alltaf sé nauðsynlegt að kaupa nýtt. Oft má nota hlutina lengur heldur en margir gera í dag. Þetta kemur sér líka vel fyrir budduna. Berum virðingu fyrir því að við eigum nóg af góðu vatni og að okkur skortir ekki mat né orku. Við eigum frábært land og þurfum ekki á rányrkju að halda.

Öll getum við lagt eitthvað af mörkum. Margt smátt gerir eitt stórt. Í staðinn fyrir einhver stór átök einu sinni á ári getur maður reynt að breyta lífsstílnum smávegis í þágu umhverfis og betri framtíð fyrir börnin okkar.