Samningar að nást um hótel

Samningaviðræður við forsvarsmenn svissnesks fjárfestingafélags um byggingu hótelbyggingar við tónlistar- og ráðstefnuhúsið Hörpu eru langt komnar, en Marriott-hótelið sem rísa mun á svæðinu verður langdýrasta hótel landsins.

Hótelið, sem rísa á við Hörpuna og taka mun til starfa árið 2015, verður allt hið glæsilegasta, en það verður búið um 270 hágæðaherbergjum. Gert er ráð fyrir að fjárfestingin verði upp á um 60 milljónir evra með lóðarverðinu, eða sem nemur tæplega tíu milljörðum króna.

Til samanburðar má nefna að virði hússins sem hýsir Hilton Reykjavík Nordica Hótel er um þrír og hálfur milljarður króna með lóðinni.

Að sögn Péturs J. Eiríkssonar, stjórnarformanns Austurhafnar, hafa samningaviðræður staðið yfir síðustu daga og vikur og gengið vel. Vonir standa til þess að viðræðunum ljúki á næstunni með samningum.

Bandaríska hótelkeðjan Marriott mun reka hótelið undir sínu nafni en það verður í hið minnsta fjögurra stjörnu. Húsið sjálft verður í eigu hins svissneska félags, sem átti hæsta boð í lóðina við hlið Hörpunnar, upp á liðlega 1,8 milljarða króna.- mh