Dúxinn úr MR með 9,83 í meðaleinkunn

„Ég hef notið þess öll árin í MR að vera með frábæra kennara sem hafa vakið áhuga á námsgreinunum og kennt þær vel,“ segir nýstúdentinn Hólmfríður Hannesdóttir, beðin um að uppljóstra leyndarmálinu að baki þeim árangri að útskrifast með 9,83 í meðaleinkunn af eðlisfræðibraut í Menntaskólanum í Reykjavík.

Það er fjórða hæsta einkunn sem gefin hefur verið í sögu skólans. Til viðbótar við það að hafa góða kennara segir Hólmfríður árangurinn byggja á heldur einfaldri formúlu: Að skipuleggja sig og nýta tímann vel.

Hólmfríður segist ekki hafa stefnt að því að verða dúx. „Nei, það var alls ekki markmið hjá mér. Mig langaði bara að ganga vel. Það var það eina sem skipti mig máli. Ég hef alltaf lært mjög mikið en ég er samt alls ekki alltaf að, heldur hef ég passað að nýta vel þann tíma þegar ég er að læra. Auk þess hefur skipt mig miklu máli að lifa heilbrigðu lífi, borða hollt og hreyfa mig, og ekki síst taka frí milli mikilla anna í skólanum.“

Hólmfríður tekur sér ekki lengri tíma en eina helgi til að ná sér niður á jörðina eftir útskrift, því strax í dag hefur hún stífa þjálfun fyrir Ólympíuleikana í eðlisfræði sem hún tekur þátt í í júlí.

„Við erum fimm sem förum héðan frá Íslandi. Fram undan eru fullir vinnudagar í undirbúningi, alveg fram að keppni. Við verðum uppi í Háskóla Íslands og þangað koma ýmsir kennarar til okkar. Þetta er mjög spennandi og ég ætla að gera hvað ég get til að standa mig vel,“ segir Hólmfríður.

Að loknum Ólympíuleikunum ætlar Hólmfríður samt að gefa heilanum frí, en þá ætlar hún í Evrópureisu með kærasta sínum og samstúdenti, Baldri Ingvarssyni, áður en alvara lífsins tekur aftur við í haust.

Hólmfríður á að baki ellefu ára nám í píanóleik, en hún lagði hann á hilluna síðastliðið haust, þegar of mikið var að gera í náminu. „Það er mjög gaman að spila á píanó og ég fékk mikið út úr því. Mig langar að halda því áfram einhvern tímann, þegar það hentar mér,“ segir hún.

Sá tími er ekki kominn, þar sem hugur hennar stefnir í háskólanám í haust. „Ég er ekki alveg búin að ákveða enn þá hvaða námsgrein ég ætla að velja, en líklega verður verkfræðin fyrir valinu,“ segir Hólmfríður að lokum.

holmfridur@frettabladid.is