ELM hættir

Lísbet Sveinsdóttir, myndlistarmaður og einn eigenda ELM, segir að hönnun ELM hafi verið seld um allan heim. Fyrirtækið hafi vaxið mikið og orðið flókið í rekstri.

"Þegar upphafsfólkið er ekki lengur með puttana í öllu vill starfsemin fljóta en fatabransinn er margslunginn," útskýrir Lísbet. "Við fundum ekki mikið fyrir kreppunni, hún kom hægt til okkar. Íslenskar konur voru tilbúnar til að kaupa íslenska hönnun og búðin hér á landi gekk ágætlega," segir Lísbet sem telur að þær þrjár sem ráku ELM, það er Erna Steina Guðmundsdóttir, Matthildur Halldórsdóttir og hún sjálf, muni hasla sér völl, hver á sínu sviði.

"Ég ætla að sinna myndlistinni en mun hafa fatahönnunina með fram en það verður ekki svona stórt. Ég sé það fyrir mér minna og hagkvæmara en ELM," segir hún.

Lísbet segir að íslenskar konur standi sig ákaflega vel varðandi hérlenda hönnun og séu duglegar að kaupa hana. "Það mætti vera meiri stuðningur við þessi litlu hönnunarfyrirtæki því hann mundi skila sér aftur til þjóðfélagsins. Það er margt klárt fólk að útskrifast í þessari grein," bætir hún við. "Það hefur verið jákvæð samkeppni á þessum markaði og margir ungir hönnuðir hafa verið að skapa sér atvinnutækifæri. Ég býst við að nýja hönnunarhúsið í gamla Sautján-húsinu muni ýta undir frekari listsköpun."

Lísbet segist ekki vita hvar hægt verði að nálgast fatahönnun sína í framtíðinni en það komi í ljós.

"Við Erna Steina eigum húsið við Laugaveg og ég geri ráð fyrir að við munum gera eitthvað skemmtilegt í þessu húsi þótt það verði ekki fyrr en eftir eitt ár. Við erum að teikna og draga upp eitthvað nýtt sem verður örugglega skemmtilegt og hluti af þeirri hönnun sem við einblínum á í framíðinni. Ég var ein af þeim sem komu að Sólon á sínum tíma og sé fyrir mér músík í ELM-húsinu. Þar er góður bakgarður sem býður upp á að njóta listarinnar. Maður á að endurskapa sig og breyta til á tíu til tólf ára fresti."