Fá betri mat á kennarastofurnar

Gera á bragarbót á mötuneytismálum kennara í grunnskólum Hafnarfjarðar. Þeir kvarta yfir því að fá ekki jafngóðan mat og aðrir bæjarstarfsmenn og að þurfa að matast með nemendum sínum.

Bæjarstjórinn ákvað fyrir þremur vikum að gerð yrði úttekt á máltíðum í skólunum og boðaði til fundar með fulltrúum allra sem tengjast málinu. Fundurinn fór fram í síðustu viku. Magnús Baldursson, fræðslustjóri Hafnarfjarðar, segir að niðurstaðan hafi verið sú að fyrirtækið Skólamatur meti hvað það þýði að tryggja að matur sé afgreiddur inni á kennarastofum svo kennararnir þurfi ekki að sækja hann í mötuneyti nemenda.

„Og hugsanlega hafa eitthvað meira utan um þann hluta matarins, meira krydd og salatbar og slíkt. Eitthvað viðameira en er fyrir nemendur,“ segir Magnús.

Tilboð er fengið í úttekt á mötuneytismálunum en Magnús segir hana ekki hefjast fyrr en á nýju ári. „Ég geri ráð fyrir að þeir muni meta alla matseðla og fara í grunnskólana og skoða aðstæður,“ segir hann. „Við leggjum áherslu á að fólki líði vel í vinnunni og við vitum að matar- og mötuneytismál skipta miklu máli til að fólki líði vel á vinnustöðum.“