Ákæra vegna brots á þagnarskyldu opinberra starfsmanna fordæmalaus

Aldrei í réttarsögunni hefur verið ákært fyrir brot á þagnarskyldu opinberra starfsmanna, að sögn ríkissaksóknara. Lögreglumennirnir tveir sem seldu þrotabúi trúnaðarupplýsingar sem þeir öfluðu í starfi sínu yrðu þeir fyrstu, ef þeir verða ákærðir.

Sérstakur saksóknari kærði ekki aðeins þá Jón Óttar Ólason og Guðmundur Hauk Gunnarsson, lögreglumenn sem unnu hjá embættinu, fyrir brot á lögreglulögum ríkissaksóknara heldur einnig fyrir brot gegn 136. gr. almennra hegningarlaga.

Mennirnir tveir gætu átt yfir höfði sér allt að þriggja ára fangelsi samkvæmt almennum hegningarlögum, verði þeir ákærðir og ef það telst sannað að þeir hafi greint frá trúnaðarupplýsingum í ávinningsskyni.

Mennirnir tveir seldu þrotabúi Milestone trúnaðarupplýsingar sem þeir öfluðu sér í starfi sem lögreglumenn. Fengu þeir m.a greiddar 30 milljónir króna fyrir 17 blaðsíðna skýrslu um meint brot forsvarsmanna og hluthafa Milestone.

Ráðningarsamningur milli fyrirtækis mannanna, Pars Per Pars og þrotabúsins er dagsettur 27. september 2011, meðan þeir voru enn fastráðnir lögreglumenn. Þeir héldu síðan áfram að vinna sem verktakar hjá embættinu löngu eftir að þeir fóru í einkarekstur.

Rúv greindi frá því í gær að skiptastjóri þrotabús Milestone hafi í ágúst til október í fyrra óskað eftir gögnum hjá sérstökum saksóknara og að Hólmsteinn Gauti Sigurðsson, saksóknari hjá embættinu, hafi falið mönnunum tveimur að finna þau gögn sem embættið myndi taka til skoðunar hvort afhenda bæri þrotabúinu.

Hólmsteinn hefur hins vegar sagt fráleitt að hann hafi vitað af, hvað þá samþykkt, að starfsmennirnir tveir væru sem einkaaðilar að vinna fyrir þrotabúið. Hann hafi þó vitað síðla árs í fyrra að mennirnir hygðu á einhvers konar einkarekstu

Valtýr Sigurðsson, fyrrverandi ríkissaksóknari, sagðist í samtali við fréttastofu ekki minnast þess að nokkur brot vegna brota lögreglumanna á þagnarskyldu hafi verið kærð til embættisins.

Sigríður Friðjónsdóttir, ríkissaksóknari, segir að mál vegna fyrir brots á þagnarskyldu lögreglumanna hafi komið upp, en aldrei hafi verið ákært í þeim eða þagnarskyldubrotum opinberra starfsmanna yfirleitt.