Mauz vill hita upp fyrir Maus

„Hann bauðst til þess að hita upp fyrir okkur ef við myndum koma saman á nýjan leik,“ segir Biggi í Maus um kollega sinn Gisj í Maus.

Gisj van Veldhuizen og félagar í Maus hafa ákveðið að breyta nafninu sínu í Mauz. Ástæðan er sú að Biggi í Maus kvartaði yfir nafni hollensku sveitarinnar, enda hefur hljómsveitin hans einkaréttinn á nafninu í Evrópu. Engu að síður munu Gisj og félagar spila á Eurosonic-hátíðinni í Hollandi á fimmtudaginn undir nafninu Maus því of seint var að breyta því í tæka tíð. „Þetta var allt á vingjarnlegu og fallegu nótunum,“ segir Biggi um tölvupóstinn sem hann fékk frá Gisj í gær.

Biggi óttaðist að aðdáendur hinnar íslensku Maus héldu að hún ætlaði að spila á Eurosonic og sú var raunin. „Þetta er svo lítill heimur. Um leið og þeir voru auglýstir á Eurosonic byrjaði ég að fá tölvupóst um hvort við værum að fara að spila. Eftir að internetið kom geta tvær hljómsveitir ekki lengur heitið sama nafni.“

Biggi og félagar í Maus spiluðu síðast saman í október 2004, eða fyrir rúmum sjö árum. Aðspurður segist hann ekki búast við endurkomu í bráð, enda búa tveir liðsmenn Maus erlendis. En kemur til greina að Mauz hiti upp fyrir Maus ef af henni verður? „Auðvitað. Það yrði ógeðslega flott en ég ætla ekki að borga undir þá flugfarið.“ - fb