Nestislausir á leið til Novi Sad

Það er ljóst að strákarnir okkar gera ekki neinar rósir á EM í Serbíu. Þar sem liðið heldur stigalaust í gríðarlega erfiðan milliriðil er ekki við miklu að búast. Miðað við spilamennsku liðsins í gær hefur íslenska liðið ekkert að gera í Frakka og Spánverja.

Fyrri hálfleikur var sorgarsaga varnar og markvörslu. Jafnræði var með liðunum framan af en eftir 13 mínútur náðu Slóvenar þriggja marka forskoti, 6-9, sem þeir héldu nánast til enda. Sóknarleikur íslenska liðsins var mjög góður nánast allan hálfleikinn en vörnin var slök og markvarslan ekkert minna en hörmuleg. Markverðir íslenska liðsins vörðu ekki bolta í rúmar 20 mínútur og á meðan markvarslan var engin skoruðu Slóvenar að vild.

Munurinn í hálfleik var fjögur mörk, 13-17, og strákarnir gríðarlega pirraðir þegar þeir fóru inn í klefa. Nákvæmlega ekki neitt breyttist í síðari hálfleiknum. Varnarleikurinn sem fyrr hreinasta hörmung og Björgvin Páll var ekki nálægt því að verja skot. Slóvenar hreinlega völtuðu yfir strákana okkar og náðu mest sjö marka forskoti. Þeir hefðu hæglega getað sent íslenska liðið heim en vildu frekar fara í milliriðil með tvö stig eins og eðlilegt er.

Þeir „leyfðu" því íslenska liðinu augljóslega að skora tvö ódýr mörk í lokin. Fyrir vikið fara þeir í milliriðilinn með tvö stig, Ísland ekkert og Norðmenn halda heim á leið. Hefðu Slóvenar unnið Ísland með meira en þremur mörkum hefðu Slóvenar farið áfram með núll stig, Norðmenn tvö og Ísland farið heim. Norðmenn voru því eðlilega súrir en þetta snýst um árangur. Íslenska liðið þekkir þessa stöðu sjálft eftir að hafa „leyft" Frökkum að skora nokkur mörk á HM árið 2007. Fyrir vikið fór Ísland í milliriðil með tvö stig þar.

Það er alveg ljóst að ef íslenska liðið ætlar að gera eitthvað af viti í næstu leikjum þarf margt að breytast. Allt sjálfstraust og öryggi er farið úr varnarmönnum liðsins. Sverre virkar hægur og Alexander er ekki nema skugginn af sjálfum sér. Hann hefur ekkert getað á þessu móti því miður.

Sömu sögu er að segja af Björgvini Páli Gústavssyni. Hann var síðasta púslið í okkar frábæra liði og með hann í formi unnum við til verðlauna. Björgvin virðist rúinn öllu sjálfstrausti og markverðirnir hafa ekkert getað. Þeir hafa þess utan varið eitt skot úr horni allt mótið.

Svo vantar miklu meiri stemningu og geðveiki í strákana. Þetta er ekkert fjandans kaffiboð og ef þeir rífa ekki upp geðveikina hjá sér verða þeir flengdir í Novi Sad. Það á engum eftir að finnast gott.