Átak við móttöku úrgangs

Umhverfisstofnun hefur að undanförnu unnið að því í samvinnu við hafnaryfirvöld að hafnir á landinu vinni áætlanir um móttöku og meðhöndlun úrgangs. Markmiðið er að tryggja viðunandi móttökuaðstöðu í höfnum og draga úr losun úrgangs í sjó frá skipum.

Tilefnið er úttekt Siglingaöryggisstofnunar Evrópu árið 2010 á hafnaraðstöðu hér á landi. Var fundið að því að engar áætlanir hafna um móttöku og meðhöndlun úrgangs höfðu verið staðfestar.

Sigurrós Friðriksdóttir, sérfræðingur hjá Umhverfisstofnun, segir að þrátt fyrir aðfinnslur Siglingaöryggisstofnunar hafi verið við lýði ágætt kerfi á Íslandi hvað varðar úrgangsmál skipa og hafna. Hins vegar segir Sigurrós að magntölur vanti í þessu samhengi en í áætlun, sem er í vinnslu, verður gætt að því sérstaklega að hafnirnar safni slíkum upplýsingum. „Áætlanirnar eru endurskoðaðar innan þriggja ára, og ráðgert að þá verði hafnirnar með þessar upplýsingar.“

Umhverfisstofnun fór fram á það við 44 rekstraraðila hafna að skila inn áætlunum um móttöku og meðhöndlun úrgangs fyrir samtals 82 hafnir. Viðbrögð voru almennt góð en í september var þeim veitt áminning sem þrátt fyrir tilmæli höfðu enn ekki sent inn áætlun.

Sigurrós telur enga ástæðu til að halda að aðstöðuleysi í höfnum hafi orðið til þess að letja sjómenn í að skila af sér úrgangi sem fellur til um borð. „Ég tel einnig að mikil framför hafi orðið á síðustu árum og íslenskir sjófarendur fari vel út úr samanburði um umgengni við önnur lönd. Lengi var viðkvæðið að hafið tæki lengi við, en þetta er ekki rétt og á því hafa allir áttað sig.“

Í ársskýrslu Úrvinnslusjóðs fyrir árið 2011 kemur fram að ágætlega hefur gengið að fá veiðarfæraúrgang til endurvinnslu, en það er stór hluti þess úrgangs sem fellur til hjá fiskiskipaflotanum. Gert er ráð fyrir að um 1.100 tonn af veiðarfæraúrgangi falli til á Íslandi árlega.

svavar@frettabladid.is