Ríkisstjórnarsamstarfið hefur skilað ótvíræðum árangri

Flokksráðsfundi Vinstrihreyfingarinnar græns framboðs er lokið. Á fundinum voru samþykktar nokkrar ályktanir, meðal annars um að ríkisstjórnarsamstarf VG og Samfylkingarinnar hafi skilað miklum og ótvíræðum árangri, að brotið hafi verið á stúlkunum þremur í pönksveitinni Pussy Riot, að varasamt sé að leggja rafmagnsstreng milli Íslands og Skotlands, að rétt sé að auglýsa opinberar stöður og að minnka eigi takmörkun á tjáningafrelsi.

Ríkisstjórnarsamstarf

„Betur má ef duga skal og þessum árangri þarf að fylgja eftir með áframhaldandi samstarfi vinstrimanna í íslenskum stjórnmálum á næsta kjörtímabili," segir í ályktun um árangur sem samstarfið hefur skilað. Flokksmeðlimir eru hvattir til að undirbúa þróttmikla og málefnalega kosningabaráttu.

Sæstrengur

Vinstri grænir leggjast gegn því að rafstrengur sé lagður milli Íslands og Skotlands. Það myndi leiða til rányrkju á íslenskum orkuauðlindum og stórhækkun á raforkuverði innanlands.

Tjáningafrelsi

Rétt er að endurskoða gamaldags lög sem takmarka tjáningafrelsi, m.a. ákvæði sem banna smánun á erlendum þjóðum, að mati VG.

Hér má lesa ályktunina í heild sinni.