Þurfti allt að fjórðung blóðeininga Blóðbankans

„Þetta er mjög mikið," svarar Þorbjörn Jónsson læknir hjá Blóðbankanum spurður út í blóðmissi Skúla Eggerts Sigurz, framkvæmdastjóri Lagastoða. Guðgeir Guðmundsson hefur verið ákærður fyrir tilraun til manndráps þegar hann stakk Skúla fimm sinnum, fjórar hnífstungur voru lífshættulegar. Í árásinni missti Skúli 50 lítra af blóði samkvæmt ákæruskjali.

Til þess að setja blóðmagnið í samhengi þá má benda á að Skúli missti sex til tífalt blóðrúmmál líkamans. Það fer þó eftir stærð manneskjunnar en í fullorðnum einstaklingum eru um fimm lítrar af blóði.

Þá má benda á að í Blóðbankanum eru sex til sjö hundruð blóðeiningar. Að sögn Þorbjörns eru það á bilinu 200 til 300 lítrar af blóði sem Blóðbankinn hefur yfir að ráð hverju sinni.

Skúli þurfti því allt að fjórðung blóðbirgða bankans vegna árásarinnar.

„Í flestum tilvikum fær maður sömu blóðflokkana gefna, en ef þú missir svona mikið þá ertu búinn að missa obbann af eigin blóði," segir Þorbjörn. Hann bendir á að blóðgjafir í svo miklu magni séu blandaðar blóðkornum, blóðvökva og svo blóðflögum.

Þá má geta þess að eftir árásina lýsti yfirlæknir Blóðbankans, Sveinn Guðmundsson, yfir neyðarástandi í blóðbankanum, bæði vegna árásarinnar auk þess sem mörg slys höfðu komið upp á skömmum tíma. Þá sagði hann í viðtali við Vísi að dæmi væru um að læknar hafa þurft að nota 70 lítra af blóði í einni aðgerð.

Guðgeir tók sér frest til þess að taka afstöðu til sakarefnanna í Héraðsdómi Reykjavíkur í dag. Hann er einnig ákærður fyrir hættulega líkamsárás þegar hann stakk Guðna Bergs lögfræðing tvívegis í lærið þegar Guðni kom Skúla til bjargar.

Skúli er enn að ná sér eftir árásina, enda líkamlegur skaði hans margvíslegur. Þannig missti hann ekki aðeins 50 lítra af blóði, heldur þurfti að fjarlægja annað nýrað og gallblöðru auk þess sem hann hlaut aðra alvarlegra áverka.