Tom Cruise geðugur, kurteis og hógvær

Kvikmyndaleikarinn heimsfrægi, Tom Cruise, fékk afmælisgjafir í Veiðivötnum í gærkvöldi í tilefni fimmtugsafmælis síns í dag en hann flaug síðan af landi brott fyrir miðnætti, eftir nítján daga dvöl hérlendis. Tom Cruise leið vel á Íslandi, þrátt fyrir allt, og erlenda kvikmyndatökuliðið var mjög ánægt með hversu vel tökurnar á Oblivion heppnuðust hérlendis.

Byrjað var strax í gærkvöldi að taka niður kvikmyndabúðirnar í Veiðivötnum en tökum á myndinni á Íslandi lauk í dag með því að nokkur loftmyndaskot voru tekin af íslenskri auðn sem á að tákna jörðina í framtíðinni eftir að hún er orðin óbyggileg.

Áður en Tom Cruise yfirgaf tökustaðinn í gærkvöldi náðu Íslendingarnir á vettvangi að færa honum gjafir í tilefni afmælisins, eins og fram kom í viðtali í fréttum Stöðvar 2 við Þór Kjartansson, tökustaðarstjóra Truenorth, en það fyrirtæki annaðist verkefnið hérlendis í samstarfi við Universal-kvikmyndaverið í Hollywood.

Tom Cruise hélt síðan af landi brott seint í gærkvöldi, en ung stúlka, Silja Dís Guðjónsdóttir, náði myndum þegar þota hans brunaði í loftið frá Reykjavíkurflugvelli um klukkan 23.

Þegar Þór er spurður hvernig Tom kom honum fyrir sjónir er svarið:

„Þetta er bara mjög geðugur maður, kurteis og hógvær."

Og þrátt fyrir að þarna færi ein skærasta kvikmyndastjarna heims fengu menn góðan vinnufrið.

„Við höfum fengið mjög góðan frið og átt gott samstarf," segir Þór og nefnir sérstaklega við veiðivörðinn í Veiðivötnum og veiðimenn.

Þarna mátti sjá leikmynd sem virðist eiga að tákna rústir af frægri byggingu og útlendingarnir sögðust ánægðir með hversu vel tökur heppnuðust á Íslandi.

„Þeir voru gríðarlega ánægðir með Ísland og fengu í rauninni allar tegundir af birtu og skýjafari. Ísland sýndi sig í bestu mynd."

En hvernig leist svo aðalleikaranum á landið og leið honum vel á Íslandi?

„Já, ég er í engum vafa um það. Þú sérð það bara sjálfur. Það er hvergi betra að vera heldur en hér," segir Þór og horfir á fjallahringinn í Veiðivötnum.

-Funduð þið það á honum?

„Ég hugsa það, já."

Um 150 Íslendingar unnu við myndina, annar eins fjöldi útlendinga kom til landsins vegna hennar, á annað hundrað bílaleigubíla voru leigðir og tugir trukka og má ætla að um 700 milljóna gjaldeyristekjur sitji eftir í landinu, og kannski er svo ómetanleg Íslandskynning framundan.