Hlakka til að spila á Íslandi eftir ótrúlegt tónleikaferðalag

Íslenska hljómsveitin Of Monsters and Men er nú komin aftur til landsins eftir vel heppnað tónleikaferðalag um Bandaríkin. Nanna Bryndís Hilmarsdóttir, söngkona, segir að sterk vináttutengsl hljómsveitarmeðlima hafi reynst nauðsynleg þegar á ferðalaginu stóð.

Velgengni Of Monsters and Men síðustu mánuði er mögnuð. Frumraun hljómsveitarinnar, My Head is an Animal, hefur notið gríðarlegra vinsælda í Bandaríkjunum en platan náði sjötta sæti á Billboard vinsældarlistanum. Er þetta besti árangur sem íslensk hljómsveit hefur náð á listanum. Þá hefur hljómsveitin spilað á fjölmörgum tónleikum ásamt því að hafa komið fram í spjallþætti Jay Leno.

„Þetta var náttúrulega ótrúlegt sjokk fyrir okkur," segir Nanna aðspurð um hvernig hljómsveitin hafi tekist á við atburði síðustu mánaða. „Það var oft erfitt að átta sig á því hvað var að gerast. En við erum með gott fólk í kringum okkur og frábæran umboðsmann. Við vorum auðvitað öll mjög góðir vinir fyrir og sú bönd eru enn sterkari nú.

Um síðustu helgi kom Of Monsters and Men fram í spjallþætti Jay Leno. Þátturinn er einn sá vinsælasti sinnar tegundar en að meðaltali horfa um fjórar milljónir manna á hverja útsendingu. Nanna segir að það hafi verið mikil lífsreynsla að spila í þættinum.

„Við mættum í myndverið um átta klukkutímum áður en þátturinn fór í loftið. Þá fórum í gegnum hljóðprufur og nokkrar æfingar fyrir framan myndavélar. Síðan fórum við baksviðs. Við bíðum þar og allt í einu kemur Jay Leno sjálfur — mætir bara inn í búningsherbergið og spjallar við okkur. Við vorum öll í smá sjokki. Hann ætlaði síðan að fara en þá stökk hann Danni vinur okkar til og bað um fá mynd af honum."

Því næst var haldið á sviðið. Nanna lýsir því þegar hljómsveitin beið eftir að vera kynnt: „Síðan var bara kallað Of Monsters and Men, tjaldið fór upp og við allt í einu byrjuð að spila. Maður var svolítið stressaður en samt vissum við að við yrðum að standa okkur."

Of Monsters and Men mun halda tónleika í Hljómskálagarðinum þann 7. júlí næstkomandi. Þetta verða einu tónleikar hljómsveitarinnar á Íslandi í sumar en að þeim loknum heldur hún aftur á tónleikaferðalag.

„Við erum hrikalega spennt fyrir því að spila í Hljómskálagarðinum," segir Nanna. „Það verður gaman að spila á Íslandi aftur."