Gilani stefnt fyrir vanvirðingu

Hæstiréttur í Pakistan hefur stefnt forsætisráðherra landsins, Yusuf Raza Gilani, fyrir vanvirðingu við réttinn. Hann hefur þráfaldlega neitað tilmælum réttarins um að taka upp á ný rannsókn á meintum auðgunarbrotum forseta landsins, Asif Ali Zardari. Gilani hefur verið boðaður fyrir dóminn á fimmtudag til að standa fyrir máli sínu.

Málið þykir undirstrika óvissuna sem ríkir á stjórnmálasviði landsins, en stjórnin á líka í deilum við yfirstjórn hersins. Telja margir að herinn standi á bak við þennan þrýsting dómara.

Þegar Zardari var kjörinn árið 2008 voru yfirvöld í Sviss að rannsaka mál þar sem hann var meðal annars grunaður um peningaþvætti. Rannsókninni var hins vegar skotið á frest þar sem forsetinn naut friðhelgi. Það hefur síðar orðið bitbein milli stjórnvalda og hæstaréttar sem segir friðhelgi leiðtoganna stangast á við stjórnarskrá.

Gilani og Zardari hafa að undanförnu verið ósparir við að gagnrýna afskipti hersins. Lét Gilani meðal annars þau orð falla að í deilum hers og stjórnvalda stæði valið milli „lýðræðis og einræðis“.

Stjórnin stóð af sér vantrauststillögu í gær, en óróanum er þó hvergi nærri lokið. - þj