Affelguðu Benz í háskaakstri um Kópavog

Ökumenn forðuðu sé í ofboði í allar áttir þegar silfruðum Benz fólksbíl var ekið háskaakstri um Skemmuveg, Álfabrekku, Engihjalla og fleiri götur Kópavogs í gærkvöldi, þótt aðeins þrjú hjól væru undir bílnum. Þetta gerðist um hálfátta leytið og ók hann kantanna á milli, upp á gangstéttarkanta og lenti meðal annara á vegriði, en við það brotnaði vinstra framhjól af og lagðist undir bílinn, sem hafnaði skömmu síðar á steinvegg, þar sem framendinn beyglaðist mjög.

Í átökunum við að aka svo laskaður sem bíllinn var orðinn, affelgaðist dekkið af hægra afturhjóli, en áfarm skrölti bíllinn á felgunni með viðeigandi neystaflugi og gúmmíreyk úr vinstra afturhjóli. Var hægri hlið bílsins líka orðin beygluð og framrúðan sprakk, en þegar loftpúðinn í stýrinu sprakk framan í ökumanninn nam hann loks staðar og tók til fótanna og hvarf. Rauk þá meira og minna úr bílnum, í góða stund.

Vitni að þessum aðförum segja að þetta hafi verið ógnvekjandi og aðeins hafi munað hársbreidd að verr færi. Ökumaður bílsins fannst ekki og lögregla hafði ekki haft uppi á eigandanum nú fyrir fréttir, en hann er karlmaður á þrítugsaldri. Bíllinn er talinn ónýtur.