Sterar og kannabis á Ísafirði

Síðdegis í gær framkvæmdi lögreglan á Vestfjörðum húsleit á heimili tveggja einstaklinga á Ísafirði en grunur lék á að í íbúðinni væru fíkniefni. Við leitina fundust kannabisfræ, áhöld sem virðast hafa verið notuð til kannabisneyslu og ætluð ólögleg hormónalyf sem talin eru notuð í tengslum við líkamsrækt.

Einstaklingarnir tveir, sem búa í umræddri íbúð, voru handteknir og vistaðir í fangageymslu meðan rannsókn stóð yfir. Þeim var sleppt eftir yfirheyrslur í gærkveldi. Þeir hafa báðir komið áður við sögu lögreglu vegna fíkniefnabrota.