Niðurstaðan vonbrigði

„Það eru bara vonbrigði," segir Björn Valur Gíslason inntur eftir viðbrögðum sínum við niðurstöðu prófkjörs VG í Reykjavík í dag. Samkvæmt niðurstöðum prófkjörsins verður hann ekki í þremur efstu sætunum á lista, hvorki í Reykjavík suður né Reykjavík norður. „Það eru alltaf vonbrigði að ná ekki markmiðum sínum. En niðurstaðan er þessi og þá bara vinnur maður úr henni," segir Björn Valur.

Aðspurður segir hann ólíklegt að hann nái kjöri á þing miðað við þessa niðurstöðu. „Já já, það er ólíklegt og ég mun bara liggja yfir því í nótt og á morgun hvað ég geri í því," segir Björn Valur. Hann var sjómaður áður en hann fór á þing. Hann segist þó ekkert vita hvort hann fer á sjóinn aftur. „Ég veit ekkert um það. Það er ekki komð að því ennþá. Það eru einhverjir mánuðir eftir enn. Ég hef engar áhyggjur af því hvernig það verður. Það koma alltaf tækifæri," segir hann.

------

Uppfært klukkan 00:45.

Fullyrt var í þessari frétt að Björn Valur hefði nokkrum sinnum tekið túra á sjó á meðan hlé hefur verið gert á þingstörfum. Björn Valur segir þessa fullyrðingu vera ranga. Hann hafi farið einn túr í blábyrjun kjörtímabilsins til að vinna uppsagnarfrest.