Aðgerðir LÍÚ ólögleg og ósvífin árás á Alþingi

„Þær aðgerðir sem Landssamband íslenskra útvegsmanna er að fara í núna, sem að mínu viti eru ólöglegar, eru ekkert annað en ósvífnar aðgerðir og eiga auðvitað ekki að líðast.“ Þetta sagði Jóhanna Sigurðardóttir forsætisráðherra á þingi í gær um þá ákvörðun útgerðarmanna að halda fiskiskipaflota landsins í höfn næstu daga til að mótmæla kvótafrumvörpum ríkisstjórnarinnar.

Jóhanna sagði aðgerðirnar brjóta gegn lögum um stéttarfélög og vinnudeilur og væru sprottnar af því að útgerðarmenn óttuðust að ná ekki fram öllum sínum ýtrustu kröfum. „Vegna þess að þegar sjálfstæðismenn og framsóknarmenn stjórnuðu þá gátu þeir verið þar inni á teppi og fengið það sem þeir vildu, en þeir fá það ekki hjá þessari ríkisstjórn.“ Hún sagði aðgerðirnar enn fremur fullkomlega óþolandi, ógeðfelldar og kallaði þær ólöglega „árás á Alþingi.“

Jón Gunnarsson, þingmaður Sjálfstæðisflokksins, varði aðgerðirnar og sagði eðlilegt að útgerðarmenn tækju sér nokkra daga til að ráðfæra sig við starfsfólk sitt um næstu skref. Allt væri þetta gert í samráði við sjómenn.

Jóhanna efaðist um að ákveðið hefði verið að ráðast í aðgerðirnar í fullri sátt við sjómenn og landvinnslufólk. „Var leitað samráðs við það um þessa aðgerð? Ég er ansi hrædd um að svo sé ekki,“ sagði Jóhanna. Það væri bjargföst skoðun hennar að um pólitískt verkfall væri að ræða sem ætti ekki heima í lýðræðisþjóðfélagi. - sh