Aðstoðarmönnum dómara falið ríkara hlutverk

Aðstoðarmönnum dómara verður, lögum samkvæmt, falið mun ríkara hlutverk í héraðsdómstólum samkvæmt nýju frumvarpi um dómstóla sem er í þinginu. Samkvæmt frumvarpinu munu aðstoðarmenn geta setið þingfestingar og fyrirtökur fyrir dómara og tekið á móti skjölum sem dómari tekur nú við. Þá munu aðstoðarmenn geta tekið ákvarðanir í málum þar sem sakborningur eða stefndi grípur ekki til varnar.

Það verður dómsstjóra að ákveða hvaða mál aðstoðarmennirnir munu fara með. Tilgangurinn með þessari breytingu verður að gefa aðstoðarmönnum færi á að létta undir með störfum dómara. Álag á dómara og ákæruvald hefur aukist mikið að undanförnu, einkum eftir bankahrun. Meirihluti allsherjar- og menntamálanefndar hefur fjallað um tillöguna og leggur til að frumvarpið verði samþykkt óbreytt.