Álver opnað á Reyðarfirði

Stærsta kersmiðjan í stærsta álveri landsins, álveri Alcoa Fjarðaáls á Reyðarfirði, var opnuð klukkan þrjú í dag að viðstöddum iðnaðarráðherra, þingmönnum og starfsmönnum fyrirtækisins. Kersmiðjan mun skapa 60 ný störf á Reyðafirði.

Vinna hófst við smiðjuna á árinu 2010 en heildarfjárfesting vegna hennar nemur þremur og hálfum milljarði króna. Ker í álverum þarf að endurnýja á 5-7 ára fresti.

Í nýju kersmiðjunni verður mögulegt að fóðra þrjú ker í einu, en opnun kersmiðjunnar er lokahnykkurinn í byggingu álversins sem var reist fyrir 5 árum.

„Það er mikið fagnaðarefni fyrir mig að vera með ykkur hér á þessum tímamótum," sagði Oddný G. Harðardóttir, fjármálaráðherra og starfandi iðnaðarráðherra í dag.

„Ég fagna því sem iðnaðarráðherra að hér er fjöldi nýrra starfa að skapast og ég fagna verksmiðjunni sem fjármálaráðherra, auknum umsvifum og auknum tekjum í ríkiskassann. Álverið á Reyðarfirði hefur verið mikil lyftistöng fyrir Austurland. Íbúum hér á Austurlandi hefur fjölgað um 1.000 síðan álverið tók til starfa."