Utanríkisráðuneytið varar Birgittu við að fara til Bandaríkjanna

Birgitta Jónsdóttir, þingmaður Hreyfingarinnar, segist hafa fengið þau skilaboð frá utanríkisráðuneytinu hér á landi að henni væri ekki óhætt að ferðast til Bandaríkjanna vegna tengsla sinna við WikiLeaks.

Aftur á móti hafi hún fengið munnleg skilaboð um það frá sendiherra Bandaríkjanna, Luis E. Arreaga, að hún yrði ekki handtekinn færi hún til Bandaríkjanna, né neydd í yfirheyrslur. Þá fullyrðir sendiherrann einnig við hana að hún sætti ekki rannsókn bandarískra yfirvalda vegna tengsla hennar við WikiLeaks.

Þetta kemur fram í grein sem Birgitta skrifaði í The Guardian fyrir tveimur dögum síðan. Hún segir þar ennfremur að sendirherra Bandaríkjanna hér á landi hafi verið gert að koma fyrrgreindum skilaboðum til hennar af beiðni bandarískra stjórnvalda.

Rannsókn bandarískra yfirvalda á WikiLeaks hefur náð svo langt að þeir hafa krafist aðgangs að einkaskilaboðum Birgittu á samskiptavefnum Twitter.

Ekki náðist í Birgittu við vinnslu fréttarinnar en hægt er að lesa greinina hennar hér.