Lyfjaverð hér orðið hið lægsta

Lyfjaverð til sjúkrahúsa hér á landi er orðið hið lægsta á Norðurlöndunum, segir Hreggviður Jónsson, formaður Viðskiptaráðs, í viðtali í tímaritinu Straumum sem er gefið út af Capacent.

„Það hefur mikið áunnist því fyrir um tíu árum var lyfjaverð á Íslandi það hæsta á Norðurlöndunum,“ segir Hreggviður. Hann er forstjóri Veritas Capital hf. sem er móðurfyrirtæki nokkurra helstu þjónustufyrirtækja heilbrigðiskerfisins á Íslandi.

Hreggviður segir gífurlegar breytingar hafa orðið á lyfjamarkaðinum hér á landi frá 2004, en þá voru gerðir samningar um að verð á frumlyfjum yrði sambærilegt og á Norðurlöndunum. Einnig hafi breytingar á greiðsluþátttöku ríkisins í lyfjakostnaði haft mikil áhrif á lyfjamarkaðinn.

„Íslensk stjórnvöld hafa gengið hart fram, sérstaklega á árunum eftir hrun,“ segir Hreggviður. Hann segist jafnvel sjá merki þess að gengið hafi verið of langt í þessum efnum: „Við erum með dæmi þess að lyfjaframleiðendur hafi ekki áhuga á að markaðssetja ný lyf á Íslandi. Við lendum líka æ oftar í þeirri stöðu að að sannfæra framleiðendur um að halda ódýrum og sölulágum lyfjum inni á þessum örmarkaði sem íslenski markaðurinn er.“