Ber sjálfur ábyrgð á hlutabréfakaupunum

Íslenska ríkið, Fjármálaeftirlitið og Kauphöllin voru í morgun sýknuð af kröfu manns sem sagðist hafa verið rændur þegar hann keypti bréf í Glitni í vikunni eftir að ríkið tók yfir 75% hlut í bankanum haustið 2008.

Hópur fólks sem tapaði milljörðum á kaupum hlutabréfa í Glitni vikuna fyrir þjóðnýtingu bankans stefndi ríkinu. Hópurinn sagðist hafa rændur þar sem ráðamönnum hafi verið grafalvarleg staða bankakerfisins ljós en engu að síður leyft kaup og sölu á hlutabréfum í bankanum.

Eftir að íslenska ríkið ákvað að leggja Glitni til nýtt hlutafé að upphæð 600 milljónir evra og verða með því eigandi 75% hlutar í bankanum töldu margir að bankanum hefði þar með verið bjargað.

Geir H. Haarde, þáverandi forsætisráðherra, sagði í útvarpsviðtali síðar sama dag að ekki væri ástæða til að ætla annað en að vel myndi ganga hjá Glitni í framtíðinni og ríkissjóður myndi innan tíðar losa sig við hlutabréfin og vonandi hafa af því fjárhagslegan ávinning.

En Glitnir féll, líkt og hinir bankarnir, aðeins um viku síður. Engu að síður var opið fyrir viðskipti með hlutabréf í Glitni hjá Kauphöllinni, þessa örlagaríku viku fyrir hrun.

Guðmundur Jón Matthíasson var einn þeirra sem stefndu ríkinu, Fjármálaeftirlitinu og Kauphöllinni og var dæmt í máli hans í morgun. „Þarna er bara saklaust fólk sem sér kauptækifæri í þessum banka og telur þetta vera orðin tryggasta banka landsins. Það kaupir þarna í góðri trú hlutabréf í bankanum til þess eins að horfa upp á það að ríkið lætur bankann fara á hausinn sjö dögum síðar," sagði Guðmundur Jón í samtali við Stöð 2 og Vísi áður en stefnan var lögð fram í fyrrasumar.