Veiddu risastóran leturhumar - sá stærsti sem sögur fara af

Í síðustu viku veiddist stærsti leturhumar sem sögur fara af á Íslandsmiðum, 88 mm að skjaldarlengd, en heildarlengd dýrsins var hálfur metri og vó hann 490 grömm samkvæmt upplýsingum frá Hafrannsóknarstofnun ríkisins.

Humarinn var veiddur í humartroll á Jóni á Hofi ÁR út af Selvogi. Eldra stærðarmet er humar sem var 85 mm að skjaldarlengd og veiddist árið 2008 norður af Eldey. Að sögn Hrafnkels Eiríkssonar fiskifræðings, hefur síðan árið 2007 mikið verið vart við stóran humar, sérstaklega við suðvestanvert landið.

Hrafnkell tengir þetta minni sókn og hugsanlega hækkandi hitastigi sjávar við landið, en sjávarhiti hefur verið hár allt frá árinu 1997. Humarinn er langlíf tegund og er stóri humarinn talinn að minnsta kosti vera 20 ára. Stærsti leturhumar sem getið hefur verið um var 92 mm og veiddist hann við Portúgal.

Valur ÍS veiddi humar í rækjuvörpu í Ísafjarðardjúpi 26. nóvember síðastliðinn. Verður það að teljast til tíðinda, að því gefnu að hann hafi ekki borist með óeðlilegum hætti í Djúpið.

Vitað er að í tvö skipti hefur humri verið sleppt í Djúpinu, fyrir um fimmtíu árum síðan og fyrir u.þ.b. fimmtán árum. Sá humar sem nú veiddist kom í vörpu við rækjuveiðar fram undan innanverðri Óshlíð. Humarinn var 56 mm að skjaldarlengd og vó 106 grömm.