Tekur út stöðuna á Íslandi

Ísland verður í brennidepli hjá Richard Quest, þáttastjórnanda á sjónvarpsstöðinni CNN nú í desember. Quest kynnti sér land og þjóð á dögunum og hitti marga, þar á meðal Ólaf Ragnar og Steingrím J. Hann naut líka dyggrar aðstoðar flugfreyjukórsins við þáttagerðina.

Richard Quest er mörgum að góðu kunnur en hann hefur um árabil verið einn helsti viðskiptablaðamaður CNN sjónvarpsstöðvarinnar. Hann stýrir eigin þætti, Quest Means Business, á stöðinni en hann fer einnig fyrir mánaðarlegum þætti sem leggur áherslu á viðskiptatengd ferðalög og málefni ferðaþjónustunnar almennt. Það var í þeim erindagjörðum sem hann var staddur hér á landi.

„Ísland hefur verið svo mikið í fréttum undanfarin ár. Fjármálakreppan, öskugosið...Þessi tími hentaði fullkomlega til að koma og taka út stöðuna," segir Quest.

Quest fór vítt og breytt um landið til þess að viða að sér efni, hitti Steingrím J. Sigfússon atvinnuvegaráðherra, Birki Hólm Guðnason framkvæmdastjóra Icelandair og Ólaf Ragnar Grímsson forseta Íslands en Quest var afar ánægður með leiðsögn Ólafs Ragnars.

„Við vorum líka mjög ánægð með að geta eytt miklum tíma með forsetanum og forsetafrúnni sem sýndu okkur stóran hluta Reykjavíkur," segir hann.

Innslagið um Ísland verður flutt þegar líða fer að jólum og því þótti upplagt að fá Flugfreyjukór Icelandair til þess að skapa örlitla jólastemmningu.

„Hvert sem ferðir þínar bera þig árið 2013 þá vona ég að að þær verði ábatasamar," segir Quest.