ÍLS sagður hlaupast frá samkomulagi

Eftirlitsnefnd um fjármál sveitarfélaga sakar Íbúðalánasjóð um að standa ekki við samkomulag um niðurfellingu skulda Bolungarvíkur. Sjóðurinn segist ekki vera aðili samningsins. Bolungarvík krefst aðgerða innanríkisráðuneytis.

Eftirlitsnefnd um fjármál sveitarfélaga segir Íbúðalánasjóð (ÍLS) ekki standa við samkomulag um fjárhagslega endurskipulagningu Bolungarvíkur, en það gerir ráð fyrir niðurfellingu skulda á félagslegu húsnæði.

Í árskýrslu nefndarinnar segir að alvarlegt sé að ekki sé hægt að standa við samkomulagið „sökum þess að ríkisstofnun – í þessu tilviki Íbúðalánasjóður – telur sig ekki bundna af því samkomulagi sem gert var“.

Snemma árs 2009 gerði eftirlitsnefndin samkomulag við Bolungarvík, en sveitarfélagið hafði leitað aðstoðar vegna fjárhagsörðugleika. Samkomulagið fól í sér að 146 milljónir króna af skuldum við Íbúðalánasjóð, vegna félagslegs húsnæðiskerfis, yrði aflétt.

Stjórn Íbúðalánasjóðs samþykkti að afskrifa að fullu helming þeirrar upphæða, eða 73 milljónir. Afborganirnar af öðrum 73 milljónum yrðu frystar í eitt ár og málið tekið til endurskoðunar þá. Bolungarvík hefur farið eftir samkomulaginu, en þegar leitað var eftir niðurfellingu afgangs skuldarinnar var ný stjórn Íbúðalánasjóðs tekin við. Hún hafnaði því að fella skuldirnar niður.

Sigurður Erlingsson, framkvæmdastjóri Íbúðalánasjóðs, segir sjóðinn ekki aðila að samkomulaginu. Það sé alvarlegt mál að opinber aðili eins og eftirlitsnefndin geti gert samkomulag við sveitarfélag sem geri ráð fyrir afskriftum Íbúðalánasjóðs, án þess að sjóðurinn komi þar að.

Þá hafi lánastofnunum í eigu ríkisins verið uppálagt að fylgja úrræði í skuldamálum sem nefnt er Beina brautin. Samkvæmt því megi ekki mismuna kröfuhöfum.

„Ef við höldum okkur við gömlu aðferðafræðina þá skapast fordæmi sem mundi kosta Íbúðalánasjóð fleiri milljarða í óþarfa afskriftir og það lendir á skattgreiðendum.“- kóp / sjá síðu 12