Sjálfboðaliðar gera Þingvelli upp

Sjálfboðaliðasamtök um náttúruvernd munu vinna að endurbótum á göngustígum í Þingvallaþjóðgarði um Jónsmessuhelgina næstu helgi.

„Þetta er mjög gott tækifæri til að kynnast Þjóðgarðinum á Þingvöllum," segir Þorvaldur Örn Árnason. Sjálfboðaliðar fá að tjalda í boði þjóðgarðsins. Matargerð verður sameiginleg og matarkostnaður lítill. Fólk getur valið um að vinna alla dagana frá föstudegi til sunnudags eða skemmri tíma.

„Við verðum að klippa úr stígunum, þeir gróa saman. Líka dálítið að grjóthreinsa og fleira í þeim dúr," segir Þorvaldur en auk þess munu sjálfboðarnir kanna gamlar leiðir í garðinum og athuga hvort mögulegt sé að opna þær aftur.

Sjálfboðaliðasamtök um náttúruvernd hafa starfað í 26 ár og hafa um 80 félagsmenn. Samtökin munu halda utan um vinnuna en allir eru velkomnir til vinnu. Þorvaldur hvetur fólk sem hefur áhuga á að leggja hönd á plóg að hafa samband með fyrirvara í síma 895-6841 svo hægt sé að ganga frá formsatriðum og útvega tjaldstæði.