Deila hagfræðings og framkvæmdastjóra LÍÚ í héraðsdómi

„Ég var einu sinni að koma út úr útsendingu á Bylgjunni sumarið 2011, og þá var hann greinilega að fara í útsendingu. Ég reyndi að kasta á hann kveðju, en það var fátt um svör," sagði Ólafur Arnarson, hagfræðingur, við dómara í morgun þegar hann talaði um samskipti sín við Friðrik Arngrímsson, framkvæmdastjóra LÍÚ.

Friðrik hefur stefnt Ólafi fyrir meiðyrði og fór aðalmeðferðin fram í Héraðsdómi Reykjaness í morgun. Friðrik mætti ekki með lögmanni sínum í dómsal en Ólafur mætti ásamt sínum lögmanni og gaf skýrslu.

Málið snýst um tvo pistla sem Ólafur birti á vefmiðlinum Pressunni, fyrst í júlí 2010 og svo í júlí 2011. Þar hélt Ólafur því fram að LÍÚ, fyrir tilstilli og undir stjórn Friðriks, styddi vefinn AMX.is til nafnlausra níðskrifa með dulbúnum fjárframlögum sem næmu tugum milljónum á ári.

Friðrik vill eina milljón í miskabætur frá Ólafi auk 1,6 milljónir til að standa straum af kostnaði við að birta dóminn í fjölmiðlum.

Ólafur sagðist ekki vera neinn pólitískur andstæðingur Friðriks og að hann ætti ekkert sökótt við hann. „Ég sá hann á landsfundi Sjálfstæðisflokksins, þannig að við erum ekki neinir pólitískir andstæðingar."

Lögmaður Friðriks spurði Ólaf út í eftirfarandi setningu í bloggfærslunni: „Nú hefur DV upplýst, að LÍÚ greiðir eina og hálfa milljón á mánuði til AMX, eða sem nemur nærri 20 milljónum króna á ári."

Ólafur sagði að þarna hafi hann verið að vísa í annan miðil, en þá hafi hann einnig haft heimildir fyrir þessu sjálfur. Lögmaður Friðriks sagði að þessi „frétt" sem Ólafur var að vísa í á dv.is var svokallað Sandkorn.

Í munnlegum málflutningi sínum sagði lögmaður Friðriks frá því að hann hafi farið fram á að færslan yrði tekin út og hann myndi biðjast afsökunar á skrifum sínum. Ólafur varð ekki við því heldur skrifaði aðra færslu með fyrsögninni: „Friðrik afneitar AMX".

Þegar Ólafur var spurður hvort færslurnar væru enn inni sagði Ólafur: „Ég hef ekki fjarlægt þær."