Gerði LÍÚ tilboð í beinni: Sendið skipin út og við skulum funda

„Ég skal gera þér tilboð. Nú skulum við hætta þessum skærum, sendið skipin á sjó og ég skal sjálfur, prívat og persónulega sjá til þess að við setjumst niður í vikunni og ræðum þetta," sagði Björn Valur Gíslason, þingflokksformaður Vinstri grænna, þegar hann gerði framkvæmdastjóra LÍÚ, Friðriki Arngrímssyni, tilboð um sáttafund á milli sambandsins og ríkisstjórnar.

Þetta kom fram í útvarpsþættinum Sprengisandi þar sem Friðrik og Björn Valur tókust á um umdeild kvótafrumvörp en tilefnið er boðuð vinnustöðvun skipaflota LÍÚ. Friðrik sagði í viðtali við Vísi í gær að það sem LÍÚ vildi fá út úr mótmælunum, eða neyðarkallinu, eins og hann orðaði sjálfur, væri að setjast niður með stjórnvöldum, stjórnarandstöðunni einnig, ásamt öllum hagsmunaaðilum, og komast að niðurstöðu sem LÍÚ telur sanngjarna.

Því kom Björn Valur með þetta tilboð, sem Friðrik sagði raunar vera stórkostlegt, þá helst vegna þess að fyrr í þættinum sagði Björn Valur að frumvarpið um veiiðgjaldið myndi fara nær óbreytt í gegnum þingið og verða samþykkt.

„Þetta er stórkostlegt tilboð. En svo segir þú að að engu verði breytt. Þetta er neyðarkall okkar til ykkar, um að þið vinnið þetta faglega, en að sjálfsögðu þiggjum við að hitta ykkur," sagði Friðrik. Björn Valur tók þá af honum orðið og sagði:

„Sendið skipin ykkar út á sjó og farið að haga ykkur eins og menn. Svo getum við fundað"

Ekki var að skilja orð Friðriks með þeim hætti að boðinu yrði tekið, það er að segja að senda skipin út á sjó og setjast niður með stjórnvöldum, enda sagði Friðrik að það væri mikilvægt fyrir útgerðir að útskýrir fyrir sínum starfsmönnum stöðu mála. Hann væri þó reiðubúinn til þess að setjast niður með stjórnvöldum.

Hér má svo hlusta á rökræður þeirra í heild.