Almennir borgarar handtóku vopnaða ræningja á Akureyri

Almennir borgarar handtóku karlmann og konu á þrítugsaldri í hádeginu í dag þegar þau reyndu að ræna apótek á Akureyri. Fólkið var í annarlegu ástandi þegar þau komu inn í apótekið vopnuð kúbeinum og með hulin andlit. Þau ógnuðu starfsfólki sem tókst þó að hrekja þau á flótta.

Þegar fólkið ætlaði að flýja af vettvangi eltu borgarar þau uppi og tókst að yfirbuga þau. Lögreglan var kölluð á staðinn, ekki vildi betur til en að einn lögreglubíll lenti í minniháttar umferðaróhappi á leiðinni þar sem vegfarandi varð ekki var við forgangsljós lögreglubifreiðarinnar.

Lögreglunni tókst þó að komast á leiðarenda og var parið handtekið. Að sögn lögreglu hefur parið áður komið við sögu lögreglunnar en þau gista nú fangageymslur lögreglunnar á Akureyri. Enginn slasaðist í umferðaróhappinu og bifreiðarnar skemmdust lítið.