Vilja aukið eftirlit með svartri atvinnustarfsemi

Stjórn Vinnumálastofnunar hefur áhyggjur af því að margir atvinnuleitendur hafa látið hjá líða að skrá sig í vinnumiðlun. Stjórnin telur þetta merki um að svört atvinnustarfsemi viðgangist.

Með átaksverkefninu Vinnandi vegur sköpuðu stjórnvöld og aðilar vinnumarkaðarins um 1.500 ný störf fyrir atvinnuleitendur. Vinnumálastofnun segir að of margir atvinnuleitendur taki ekki þátt í verkefninu. Þetta segir stofnunin merki um að atvinnuleitendur fái svartar tekjur annars staðar frá.

Af þessu tilefni hvetur stjórnin til að eftirlit með svartri atvinnustarfsemi verði eflt og löggjöf varðandi viðurlög við bótasvikum og höfnun vinnu verði endurskoðuð.

"Svört atvinnustarfsemi og bótasvik grafa undan grunni velferðarkerfisins og samfélaginu í heild," segir í ályktun Vinnumálastofnunar.