Illugi vill að Ásta slái á puttana á Steingrími

Illugi Gunnarsson telur að Alþingi muni þurfa að koma saman í júlí til að ræða frumvarp um auðlindagjald. Þetta kom fram í umræðum um störf Alþingis í dag. Hann segir ástæðuna vera þá að breytingar á frumvarpinu sem meirihluti atvinnuveganefndar hafi lagt fram séu það miklar að sérfræðingar og hagsmunaaðilar þurfi að fá tækifæri til að veita þeim umsögn. Siv Friðleifsdóttir, þingmaður Framsóknarflokksins, tók undir þessa kröfu Illuga.

Illugi gagnrýndi Steingrím J. Sigfússon harðlega fyrir að hafa lagt frumvarpið fram og sagði það mjög illa undirbúið. „Ég tel einboðið virðulegi forseti að forsætisnefnd og forseti setjist niður með hæstvirtum sjávarútvegsráðherra og bendi honum á að þingið muni ekki taka við fleiri málum frá þeim hæstvirtum ráðherra sem svona illa eru undirúin. Það er skömm að því hvernig þetta mál er lagt inn í þingið, óhugsað og óundirbúið," sagði Illugi.

Illugi telur að þingið geti ekki starfað út júnímánuð vegna forsetakosninganna. Þess vegna þurfi þingmenn að taka sér hlé í júní og koma svo aftur saman í júlí.