Grunnur verðmætasköpunar samfélagsins er lagður í velferðarkerfinu. Hvort sem við lítum til menntunar unga fólksins, rannsóknar í háskólum, eða aðstoð við þá sem hafa orðið fyrir áföllum, þá gegnir velferðarkerfið lykilhlutverki til að skapa gott samfélag. Fólk vill búa og starfa þar sem velferðarkerfið er sterkt.
Sterkt samfélag
Við jafnaðarmenn höfum bent á, að þau samfélög sem byggð eru á sameiginlegri ábyrgð allra á velferð almennings, hvort sem litið er til almennrar menntunar, jafnvægis í tekjum og eignum, eða uppbyggingar innviða, eru jafnframt þau samfélög sem reynast hvað samkeppnishæfust á alþjóðlegum vettvangi.
Þannig farnast þeim ríkjum best, sem geta búið þegnum sínum öryggi og velferð. Þar sem jöfnuður er ríkjandi meðal íbúa eru félagsleg vandamál færri, ofbeldi er minna, félagslegur hreyfanleiki er meiri og almennt heilsufar og lífslíkur mun betri. Samheldni og samstaða íbúa er meiri.
Hlífum tekjulágum
Við endurreisn ríkissjóðs hafa jafnaðarmenn freistað þess að stíga varlega til jarðar gagnvart þeim sem hafa úr minni fjármunum að spila en leitað til þeirra sem hafa breiðustu bökin. Þannig leiddu breytingar á tekjuskatti einstaklinga til þess að tekjuskattur lækkaði hjá 60% einstaklinga – þeirra sem eru með lægri tekjurnar. Alls greiða 85 þúsund manns lægra hlutfall af tekjum sínum í skatt árið 2010 en árið 2008. Þannig höfum við stefnt að auknum jöfnuði.
Velferðarkerfið verður ekki sterkt nema til komi verðmætasköpun í samfélaginu. En gleymum því ekki að sterkt atvinnulíf byggir á öflugu menntakerfi, heilbrigðiskerfi og almannatryggingum. Samfélag jafnaðar treystir á velferðarkerfið. Þangað sækjum við sterkan mannauð sem skapar verðmætin.
