Forskot Romneys nú orðið nánast öruggt

Forkosningar Repúblikanaflokksins í Wisconsin þykja líklegar til að staðfesta nánast óyfirstíganlegt forskot Mitt Romneys á mótframbjóðendur hans. Santorum talinn kominn á lokasprettinum. Ron Paul heldur þó ótrauður áfram.

„Sannleikurinn er sá, að ég er að bjarga Repúblikanaflokknum frá sjálfum sér því þeir vilja endalaus stríð,“ sagði Ron Paul, einn fjögurra repúblikana sem sækjast eftir því að verða forsetaefni flokksins.

Nú þegar forkosningar flokksins eru að verða hálfnaðar þá virðist Paul eiga sáralitla möguleika á sigri. Hann ætlar þó ótrauður að halda áfram baráttunni og gagnrýnir mótframbjóðendur sína harðlega fyrir að ætla að halda áfram að ausa fé úr ríkissjóði til stríðsrekstrar í Afganistan og jafnvel víðar um heim.

„Þetta er sóun, endalokin verða ekki góð, og ég held að repúblikanar hafi grafið sig niður í holu vegna þess að þeir eru að reyna að yfirkeyra forsetann með hernaði, segja að við eigum að gera meira af þessu. Samt segjast 75 prósent Bandaríkjamanna hafa fengið nóg af þessu,“ sagði Paul í sjónvarpsviðtali.

Næstu forkosningar flokksins verða haldnar í Wisconsin, Washington-borg og Maryland í dag. Mestu munar þar um Wisconsin, þar sem 42 kjörmenn eru í boði.

Mitt Romney er með yfirburðastöðu. Hann hefur þegar tryggt sér að minnsta kosti 453 kjörmenn af þeim 1.144 sem hann þarf til að verða fyrir valinu á landsfundi Repúblikanaflokksins í ágúst. Að auki hafa 110 kjörmenn lýst yfir stuðningi við hann, þótt þeir séu óbundnir þegar til atkvæðagreiðslu kemur.

Rick Santorum hefur tryggt sér stuðning 193 kjörmanna og fengið stuðningsyfirlýsingu frá 71 til viðbótar. Newt Gingrich hefur tryggt sér stuðning 132 kjörmanna og á líklega stuðning 33 vísan til viðbótar. En Ron Paul hefur aðeins tryggt sér 26 kjörmenn, þótt hann eigi líklega stuðning 52 vísan til viðbótar.

„Ég held að það séu yfirgnæfandi líkur á því að Mitt Romney verði forsetaefni okkar,“ segir Mitch McConnell, leiðtogi minnihluta Repúblikanaflokksins í öldungadeild Bandaríkjaþings. „Mér sýnist að við séum á lokasprettinum við að klára þetta val. Flestir þingmenn repúblikana í öldungadeildinni annað hvort styðja hann, eða eru á sama máli og ég um að nú sé kominn tími til að beina athygli okkar að kosningabaráttunni í haust og byrja að beina spjótum okkar að forseta Bandaríkjanna.“

Samkvæmt skoðanakönnunum hefur Romney til þessa þótt líklegastur repúblikananna fjögurra til að vinna sigur á Barack Obama þegar kosningar verða haldnar í nóvember. Fylgi Obama hefur hins vegar aukist á síðustu dögum.

Þá eru stuðningsmenn Obama strax byrjaðir að skjóta föstum skotum að Romney, meira en hálfu áru fyrir kosningar.

gudsteinn@frettabladid.is