Of monsters and men og Agnes menn ársins

Agnes M. Sigurðardóttir, biskup Íslands, er annar maður ársins hjá Stöð 2. Hún er fyrsti kvenbiskupinn í þúsund ára sögu kirkjunnar hér á landi, en 110 karlmenn hafa farið með þetta embætti á undan henni.

Hún segir meðal annars í viðtali við Eddu Andrésdóttur að hún trúi því að ásýnd hafi einnig áhrif, þannig líti hún svo á að kvenleg ásýnd breyti miklu hjá kirkjunni.

Eins er Agnes mjög tæknivædd miðað við forvera sína, meðal annars heldur hún úti Facebook-síðu og Twitter-síðu. Það segist hún gera til þess að kirkjan sé sýnilegri.

Hljómsveitin Of Monsters and men er einnig menn ársins hjá Stöð 2. Það er óhætt að segja að hljómsveitin hafi farið sigurför um allan heim en afrek þeirra á alþjóðlegum tónlistarvettvangi hefur verið með ólíkindum. Þau segja sjálf að þau hafi ekkert breyst þrátt fyrir velgengni sína.