Villas-Boas: Lærði af mistökum mínum hjá Chelsea

André Villas-Boas ræddi í fyrsta skipti við breska blaðamenn í dag eftir að hafa tekið við starfi knattspyrnustjóra enska úrvalsdeildarfélagsins Tottenham Hotspur.

Villas-Boas, sem er aðeins 34 ára, tók við liði Chelsea síðastliðið sumar eftir að hafa náð frábærum árangri með Porto í heimalandi sínu, Portúgal.

Árangur Chelsea undir stjórn Villas-Boas var ekki nógu góður að mati eigandans Roman Abramovich. Portúgalinn var því látinn taka poka sinn en ráðning hans hafði verið kynnt sem ráðning til framtíðar.

Þrátt fyrir að hafa verið rekinn eftir innan við ár í starfi vildi Villas-Boas ekki viðurkenna að um klúður hafi verið af hans hálfu.

„Ég ber ekki einn ábyrgð á klúðrinu. Því er ég ekki sammála," svaraði Villas Boas spurningu blaðamanns í dag. Portúgalinn mátti sjá eftirmann sinn, Roberto Di Matteo, stýra Chelsea til sigurs í enska bikarnum og Meistaradeild Evrópu.

„Það má ekki gleyma því að leikmannahópurinn var myndaður með framtíðina í hug. Eigandinn, sem tók ákvörðunina (um að reka mig) sem ég virði þó svo að ég hafi ekki verið henni sammála, sagði upp samningnum."

„Þetta er aldrei eins manns klúður, ég get ekki verið sammála því. Ég gerði mistök sem ég hef lært af en ákvörðunin um að binda endi á verkefnið var ekki mín. Hún kom frá eiganda Chelsea," sagði Villas-Boas.

Portúgalinn segist ætla að byggja á því góða starfi sem Harry Redknapp hefur skilað hjá Tottenham undanfarin ár.

„Að skilja við það sem Harry lætur eftir sig væru mistök. Ég reyni að byggja á því og nýta til þess að skila bikurum í hús hjá Tottenham," sagði Villas-Boas sem fengið hefur til liðs við sig belgíska miðvörðinn Jan Vertonghen auk Gylfa Þórs Sigurðssonar.

Óvissa ríkir um framtíð króatíska miðjumannsins Luka Modric. Villas-Boas hrósaði Modric í hástert en Króatinn er þrálátlega orðaður við brottför frá félaginu. Real Madrid þykir líklegur áfangastaður kappans.

„Það er í höndum stjórnarformannsins að ákveða hver besta lausnin fyrir félagið sé," sagði Villas-Boas varðandi Modric.