Þvottastöðvar knúnar fótafli viðskiptavina

Ef hugmyndir átta bandarískra listhönnuða ganga eftir verður ekki langt í að þvottastöðvar, sem í leiðinni verða hálfgerðar félagsmiðstöðvar, skjóti upp kollinum víða um land.

Hugmyndin fæddist eftir átta daga hjólreiðaferð áttmenninganna frá Höfn til Reykjavíkur sem lauk síðastliðinn sunnudag. Ferðalagið er liður í verkefni bandarísku listasmiðjunnar Future sem hefur það að markmiði að nýta listhönnun til að vinna að jákvæðum breytingum í samfélaginu en einnig kemur bílaleigan Kúkú Campers að verkefninu.

Í síðustu viku stóð hópurinn fyrir sérstæðum fundi á Hjartatorginu til að leita ráða og betrumbæta hugmyndina. Til hans var efnt með þeim hætti að hópurinn gaf ferðamönnum sem áttu leið um miðbæ Reykjavíkur stakan sokk en sá sem hann fékk varð síðan að mæta á Hjartatorgið til að finna hinn sokkinn sem passar við. Þegar þangað var komið voru ferðamenn spurðir spjörunum úr og þannig reynt að nýta reynslu þeirra af Íslandi til að betrumbæta hugmyndirnar.

Marc O?Brien, sem hefur forgöngu fyrir hópnum, segist vonast til að fá til fundarins landeigendur og fólk úr fasteignageiranum sem hugsanlega geti lagt þeim lið með því að finna þessum þvottastöðvum stað. Þeir þurfa þó ekki að koma með sokk, segir hann kankvís.

En hvernig kom þetta til? ?Þegar við vorum komin í höfuðborgina var fatnaður okkar orðinn illa lyktandi enda eru engar þvottastöðvar á leiðinni,? segir hann. ?Okkur fannst líka að ferðamenn héldu mikið til hver í sínu horni. Svo vitum við öll að fæstir hafa gaman af fataþvotti. Hugmyndin byggir á því að bæta úr öllu þessu. Fyrir framan sjálfa þvottastöðina verður afdrep þar sem ferðamenn og aðrir geta hist, fengið sér jafnvel léttar veitingar, deilt reynslu sinni með öðrum ferðalöngum og jafnvel hlýtt á tónlist. Þvottavélin sjálf yrði síðan í húsbíl frá Kúkú Campers en hún verður ekki knúin með rafmagni heldur með tveimur reiðhjólum. Svo getur fólk spjallað meðan það hjólar þvottinn hreinan.?

O?Brien segist vonast til þess að Íslendingar taki þessum hugmyndum vel og sé tilbúið að vinna að þeim. Hópurinn fer reyndar fljótlega af landi brott en hann segist vel geta komið hér aftur fljótlega sé krafta hans þörf við að ýta þessu úr vör.

jse@frettabladid.is