Allri ábyrgðinni velt yfir á Byr

Jón Þorsteinn Jónsson, fyrrverandi sparisjóðsstjóri Byrs sparisjóðs og Ragnar Zophonías Guðjónsson, fyrrverandi sparisjóðsstjóri voru fundnir sekir um umboðssvik fyrir að hafa veitt fyrirtækinu Exeter Holdings ehf. lán án fullnægjandi veða til að kaupa stofnfjárbréf á yfirverði í sparisjóðinum Byr.

Jón og Ragnar veittu í krafti stöðu sinnar fyrirtækinu Exeter lán frá Byr sparisjóði í því skyni að fyrirtækið keypti stofnfjárbréf sem tvímenningarnir sjálfir áttu í Byr sparisjóði. Hæstiréttur komst öfugt við héraðsdóm að þeirri niðurstöðu að þeir hefðu farið út fyrir heimildir sínar til lánveitinga.

Hæstiréttur segir að með aðgerðum sínum hafi Jón og Ragnar komið málum þannig fyrir að áhættu á tjóni vegna stofnfjárbréfanna var velt yfir á Byr sparisjóð og þar með losnað sjálfir undan ábyrgð. Með því að misnota sér embætti sín hjá sparisjóðnum í þessu skyni gerðust þeir sekir um umboðssvik og hlutu 4 ára og 6 mánaða fangelsisdóm.

Umboðssvik eru samkvæmt 249. gr. almennra hegningarlaga þegar menn í stjórnunarstöðum misnota aðstöðu sína sér eða öðrum til hagnaðar.